وزیراعظم بار بار عدلیہ کی توہین کر رہے ہیں، عبدالقدیرخان

اٹک: پاکستان کے معروف ایٹمی سائنسدان ڈاکٹر عبدالقدیر خان نے کہا ہے کہ پرویز مشرف کو پکڑ کر بلوچستان کی عوام کے حوالے کر دیا جائے تو بلوچوں کا آدھا درد کم ہو جائے گا، وزیراعظم بار بار عدلیہ کی توہین کر رہے ہیں۔ اٹک میں ایک غیر سرکاری تنظیم کے زیر اہتمام تقریب سے خطاب کرتے ہوئے ڈاکٹر عبدالقدیر خان نے کہا کہ سب لوگ ملکی حالات سے پریشان ہیں اور ہر جگہ کرپشن کا راج ہے۔ انہوں نے کہا کہ بلوچستان کے حالات بہت خراب ہیں اور وہاں عوام کا قتل عام ہو رہا ہے، اگر پرویز مشرف کو پکڑ کر بلوچ عوام کے حوالے کر دیں تو ان کا آدھا درد کم ہو جائے گا۔ عبدالقدیر خان نے کہا کہ وزیراعظم مسلسل عدلیہ کی توہین کر رہے ہیں۔ سپریم کورٹ نے راجا پرویز اشرف کو رشوت خور قرار دیا لیکن حکومت نے انہیں پھر وزیر بنا دیا اس سے عدلیہ کی توہین ہوئی۔ ڈاکٹر عبدالقدیر نے کہا کہ رحمان ملک سوری اخلاص تو پڑھ نہیں سکتے کسی کیلئے فاتحہ کیا کریں گے۔