Posted by Unknown on Saturday, December 04, 2010
کراچی سے بھارت جانے والی تھر ایکسپریس بم سے اڑانے کی کوشش ناکام کراچی سے بھارت جانے والی تھر ایکسپریس کو بم سے اڑانے کی کوشش ناکام ہوگئی۔ پٹری ٹوٹنے سے تین بوگیاں اتر گئیں، کوئی جانی نقصان نہیں ہوا۔ تھر ایکسپریس میں ایک سو پچپن مسافر سوار تھے۔ گیارہ بوگیوں پر مشتمل یہ ٹرین رات کے وقت کراچی سے روانہ ہوئی۔ دھابیجی کے مقام پراس کے آخری تین ڈبے پٹری سے اتر گئے۔ دو ڈبوں میں ریلوے کا عملہ اور گارڈ جبکہ تیسرے میں مسافر سوار تھے۔ ریلوے حکام کے مطابق دھابیجی کے مقام پر ریلوے ٹریک کا اڑھائی فٹ کا ٹکڑا غائب تھا جس کی وجہ سے حادثہ پیش آیا۔ ریلوے ذرائع کا کہنا ہے کہ ٹریک کو بم دھماکے سے اڑایا گیا۔ ٹریک سے تار اور بیٹری کے ٹکڑے بھی ملے ہیں۔ ریلوے کے عملے نے ٹریک کلیئر کر کے ٹرین کو بھارت روانہ کر دیا۔
Posted by Unknown on Saturday, December 04, 2010
پاکستان کے بغیر دہشتگردی کیخلاف جنگ نہیں جیتی جا سکتی، گیلانی
وزیر اعظم یوسف رضا گیلانی نے افغان صدر حامد کرزئی سے ملاقات کی ہے جس میں دہشتگردی سمیت دیگر امور پر بات چیت ہوئی۔ ملاقات میں پاکستان اور افغانستان کے درمیان تعلقات کے فروغ پر اتفاق ہوا ہے۔ ملاقات کے بعد مشترکہ پریس کانفرنس کرتے ہوئے وزیر اعظم یوسف رضا گیلانی کا کہنا تھا کہ پاکستان کے بغیر دہشتگردی کے خلاف جنگ جیتی نہیں جا سکتی۔ انہوں نے کہا کہ پاکستان نے دہشتگردی کے خلاف جنگ میں بہت نقصان اٹھایا۔ وزیر اعظم کا کہنا تھا کہ ہمیں ایک دوسرے کے مسائل سے آگاہ ہونا چاہیے۔ انہوں نے کہا کہ دہشتگردی کے خاتمے کیلئے افغانستان سے ہر ممکن تعاون کریں گے۔ اس موقع پر افغان صدر حامد کرزئی کا کہنا تھا کہ دونوں ممالک کو عدم اعتماد کی فضا کو ختم کرنا ہو گا اور وزیر اعظم گیلانی کا دورہ اہمیت کا حامل ہے۔ انہوں نے کہا کہ وزیر اعظم گیلانی کا افغانستان آنے پر شکریہ ادا کرتا ہوں ۔ جبکہ انہوں نے بتایا کہ وکی لیکس کے حوالے سے بہت سے لوگوں نے مجھ سے رابطہ کیا۔ ان کا کہنا تھا کہ پاکستان نے افغان مہاجرین کا بہت خیال رکھا۔
Posted by Unknown on Friday, December 03, 2010
خواتین کومختلف فحاشی،جنسی تشدد اورنائٹس کلب میں کام کرانے کی غرض سے یونان لانے والے انسانی گروہ گرفتار
ایتھنز(بیورورپورٹ)روس اور دیگر ممالک سے خواتین کومختلف فحاشی،جنسی تشدد اورنائٹس کلب میں کام کرانے کی غرض سے یونان لانے والے ایک انسانی گروہ کے خلاف یونانی پولیس کایونان کے مختلف بڑے شہروںمیں بیک وقت کارروائی غیر قانونی طورپرخواتین کویونان لانے والے سترہ انسانی سمگرگرفتار مزید ایک سوساٹھ کی تلاش جاری۔یونان کے شہروں ایتھنز،لامیا،وولوس،لاریسا،تھسلونیکی،فلورینا اوردیگر شہروںمیں کی جانے والی بیک وقت کارروائی میں سترہ افراد کوحراست میں لے لیاگیا۔خواتین کویونان غیر قانونی طورپر لانے والے گروہ کے افراد روس اوردیگر روسی ریاستوں کوخواتین کویونان لاکر ان کونائٹس کلبز،قحبہ خانوں اوردیگر فحاشی کے اڈوں پر ان سے کام لیتے تھے۔پولیس کے مطابق اسی فی صدی خواتین کومشرقی یورپی ممالک سے یونان لایاجاتاتھا۔پولیس کاکہناہے کہ خواتین کو یونان لانے والے گروہ کاماسٹرمائنڈ ایک چالیس سالہ شخص بیان کیاجاتاہے جوبیکریز اورنائٹ کلبز کی متعدد دکانوں کوچلاتاہے۔گرفتارکیے جانے والے افراد کے خلاف مزید تحقیقات جاری ہیں۔
Posted by Unknown on Friday, December 03, 2010
یونان کے معروف صحافی سکندرریاض چوہان کے والد محترم کے انتقال پرملال پریونان،پاکستان سمیت دنیابھر سے اظہار تعزیت
ایتھنز(بیورورپورٹ)یونان کے معروف صحافی سکندرریاض چوہان کے والد محترم کے انتقال پرملال پریونان،پاکستان سمیت دنیابھر سے ان کوتعزیتی پیغامات موصول ہورہے ہیں۔دنیابھرمیں ان کے دوست احباب نے ان کے والد محترم کے انتقال پرملال پران سے اظہار تعزیت کرتے ہوئے انکے لیے صبرجمیل کی دعاکی۔یونان سے بھی پاکستانی برادری کے معززین سمیت دوست احباب نے ان سے ٹیلی فونک اظہار تعزیت کیا۔یونان سے پاکستان گئے ہوئے پاکستانی برادری کی شخصیات نے بھی ان کی رہائش گاہ پرجاکر اظہار تعزیت کیا۔سکندرریاض چوہان نے اپنے تمام دوست احباب اوراندرون بیرون ملک،یونان یورپ کے دیگرممالک سمیت دنیابھر سے موصول ہونے والے تعزیتی پیغامات پران کاتہہ دل سے شکریہ اداکیاہے اوراپنی اوراپنے اہل خانہ کی جانب سے اس دکھ کی گھڑی میںاپنے ہمدردانہ پیغامات سے جوحوصلہ افزائی کی ہے اس پران کاتہہ دل سے شکریہ اداکیاہے اورتمام احباب کے لیے نیک تمناؤں کااظہارکیاہے۔
Posted by Unknown on Friday, December 03, 2010
گجرات(پ،ر)چوہان برادری کے سربراہ اوریونان کے معروف صحافی سکندرریاض چوہان ،عامر ریاض چوہان،اسد ریاض چوہان،تنویر ریاض چوہان،شاہد ریاض چوہان اوروقاص ریاض چوہان کے والد محترم معروف مسلم لیگی رہنما حاجی ریاض احمد چوہان جن کاگذشتہ روز رضائے الہی سے انتقال ہوگیاتھا کے ختم قل کی محفل جامع مسجد صدیقہ محلہ امین آباد سرگودھا روڈ گجرا ت میں منعقد کی گئی۔ختم قل کی محفل میںاہل علاقہ سمیت،علاقے کی ممتاز سیاسی،سماجی،فلاحی ودینی شخصیت کے علاوہ ان کے دوست احباب اورعزیز واقارب کی کثیر تعداد شریک تھی۔ختم قل کی محفل کاآغاز تلاوت قرآن پاک سے کیاگیا جس کے بعدمقامی نعت خواں حضرات نے ثناخوانی کی ۔نعت خوانی کے بعد قاری محمد اسلم آف شادیوال،قاری محمد اشرف نقشبندی،حکیم یوسف،مولوی نذیر انجم اورقاری محمدافضل نے ختم قل میں تلاوت قرآن پاک اورختم شریف کے علاوہ مختصر خطاب کیا۔اس موقع پر مرحوم حاجی ریاض احمد چوہان کی روح کے ایصال ثواب کے لیے چار ہزار پینسٹھ قرآن مجید کے علاوہ کثیر ترین تعداد میں یاسین اوردیگر وظائف پیش کیے گے۔
Posted by Unknown on Friday, December 03, 2010
بجلی پیدا کرنے والا بحری جہاز کراچی پہنچ گیا تاہم کراچی کو اس سے براہ راست کوئی فائدہ نہیں پہنچ سکے گا اور نہ ہی شہر میں جاری طویل عرصے سے لوڈشیڈنگ ختم ہو سکے گی ،کراچی الیکٹرک سپلائی کمپنی اس جہاز پر نصب پلانٹ سے جتنے بجلی براہ راست حاصل کرے گی پیپکو کراچی کو دی جانے والی 650 میگاواٹ بجلی میں اتنی ہی کمی کردے گا۔اگر ایسا ہوا تو کراچی کے عوام لوڈشیڈنگ کے عذاب سے تو نہیں نکل پائیں گے البتہ مہنگی بجلی کابوجھ بھی برداشت کرنا پڑے گا جوپہلے سے پریشان حال شہریوں کو مزید عذاب میں مبتلا کرے گا۔
رینٹل پاور پلانٹ سے ملنے والی بجلی مہنگی اور تقریباً 11 روپے فی یونٹ پڑے گی جبکہ واپڈا سے ملنے والی بجلی ہائیڈل ہونے کی وجہ سے بہت زیادہ سستی ہے، اگر واپڈا سے کے ای ایس سی کو براہ راست ملنے والا کوٹہ کم ہو کر رینٹل پاور پلانٹ سے بجلی حاصل کی گئی تو اس کا براہ راست کے ای ایس سی صارف پر بوجھ پڑے گا۔ واپڈا سے فی یونٹ تقریباً 6 روپے ملتا ہے۔ بعض ماہرین کا کہنا ہے کہ اگر اس جہاز سے پیدا ہونے والی تمام 232 میگاواٹ کے ای ایس سی کو دئیے جاتے ہیں اور 650 میگاواٹ پہلے ملنے والی بجلی میں کمی نہیں کی جاتی تو اس سے کراچی میں فوری لوڈشیڈنگ کا خاتمہ ہو سکتا ہے۔ ماہرین کا کہنا ہے کہ کراچی سمیت ملک میں پہلے ہی بعض پیداواری یونٹ فرنس آئل نہ ہونے یا تیل مہنگا ہونے کے باعث اپنی پوری استعداد میں نہیں چل رہے ہیں۔
آپ کے خیال میں رینٹل پاور پلانٹ سے بجلی کی لوڈشیڈنگ کا خاتمہ ہوسکے گا؟
عوام رینٹل پاور پلانٹ کی مہنگی بجلی برداشت کرسکیں گے ؟
Posted by Unknown on Friday, December 03, 2010
اپوزیشن اورحکومت کی اتحادی جماعتوں نے آرجی ایس ٹی بل کی پھرمخالفت کردی ہے اور مسلم لیگ ن، مسلم لیگ ق، ایم کیوایم، اے این پی،جے یوآئی اور جماعت اسلامی نے جنرل سیلز ٹیکس میں اصلاحات کے بل پرسینیٹ قائمہ کمیٹی برائے خزانہ میں اختلافی نوٹ جمع کرادیا ہے جبکہ ایم کیوایم نے آرجی ایس ٹی کی حمایت کوزرعی انکم ٹیکس کیساتھ مشروط کردیاہے۔وزیراعظم یوسف رضا گیلانی نے بھی ایم کیوایم کے قائد الطاف حسین اور اے این پی کے سربراہ اسفندیار ولی سے ریفارمڈ جی ایس ٹی بل کی حمایت کرنے کی درخواست کی جس پر دونوں رہنماؤں نے حکومت سے اپنے تحفظات اور خدشات دور کرنے کا مطالبہ کیا ہے۔ حکومتی ذرائع کے مطابق متحدہ کے قائد الطاف حسین کا کہنا ہے کہ آرجی ایس ٹی پر ایم کیو ایم کے تحفظات اور خدشات دور کردیئے جائیں تو متحدہ بل کی حمایت کرے گی تاہم جو تجاویز ایم کیو ایم نے دی ہیں ان کو بھی حکومت منظور کرے۔آر جی ایس ٹی پر متحدہ قومی موومنٹ کی حمایت حاصل کرنے کیلئے وفاقی وزیر خزانہ ڈاکٹر عبدالحفیظ شیخ اور وفاقی وزیر داخلہ رحمن اے ملک نے بدھ کو گورنر ہاؤس میں ایم کیو ایم کے اعلیٰ سطح کے وفد سے تفصیلی مذاکرات کئے جو 7گھنٹے سے زائد جاری رہے، طویل مذاکرات کے بعد بھی کوئی نتیجہ نہیں نکل سکا لیکن دونوں فریقوں نے بات چیت جاری رکھنے پر اتفاق کیا ہے۔متحدہ قومی موومنٹ کے رہنما فاروق ستار نے کہا ہے کہ ہم نے حکومتی وفد کو زرعی ٹیکس کے نفاذ سمیت 9سفارشات دیں ،اور ہماری جانب سے حکومت کو متبادل تجاویز بھی دی گئی ہیں ۔تجزیہ کاروں کا کہنا ہے کہ اگر آر جی ایس ٹی کے عدم نفاذ کی صورت میں آئی ایم ایف ناراض ہوگیا توسرکاری ملازمین کو تنخواہیں بھی نہیں مل سکیں گی۔ حکومت کا موقف ہے کہ آر جی ایس ٹی سے عام آدمی متاثر نہیں ہوگا ۔کیا آپ اس موقف سے اتفاق کرتے ہیں؟
آر جی ایس کی کے بجائے زرعی ٹیکس کا نفاذ زیادہ بہتر نہیں ہوگا؟
حکومت امراء اور جاگیرداروں پر ٹیکس لگانے اور حکومتی اخراجات کم کرنے پر کیوں آمادہ نہیں؟
Posted by Unknown on Friday, December 03, 2010
پاکستانی خواتین کرکٹ ٹیم نے نئی تاریخ رقم کرتے ہوئے گوانگ ژوچین میں گولڈ میڈل کو ماتھے کا جھومر بنالیااورپوری قوم کو عید کا شاندار تحفہ دیا ہے ، جس کا اعتراف کرتے ہوئے شائقین کرکٹ نے وطن واپسی پر فاتح ٹیم کا پرتپاک استقبال کیا ہے۔
پاکستانی خواتین نے پہلی مرتبہ ایشین گیمز میں شامل ہونے والے ٹی ٹوئنٹی کرکٹ ایونٹ میں اپنی برتری ثابت کرتے ہوئے پانچوں میچوں میں خودکوناقابل شکست ثابت کیا۔ فائنل میں بنگلہ دیش کے خلاف10 وکٹ کی فتح نے اسے ایشیائی کرکٹ پراگلے چار سال کی حکمرانی دلا دی۔ پاکستانی ٹیم کی کپتان ثناء میر نے کہا ہے کہ ہماری کامیابی قوم کے لیے عید کا تحفہ ہے، پوری ٹیم نے اس جیت میں اہم کردار ادا کیا تاہم جویریہ کا کردار نمایاں رہا۔ پاکستانی خواتین ٹیم نے اپنی شاندار کارکردگی اور خوبصورت فتح سے مردوں کی ٹیم کے لیے بھی نئی راہ متعین کردی ہے ، اب قومی ٹیم پر بھی ذمہ داری عائد ہوتی ہے کہ جنوبی افریقا کے خلاف فیصلہ کن ٹیسٹ میں کامیابی حاصل کرکے اس جیت کے سلسلے کو آگے بڑھائے۔
Posted by Unknown on Friday, December 03, 2010
ایشین گیمز میں ہاکی کا فائنل مقابلہ جیت کر پاکستان 20 سال بعد ہاکی کا ایشیائی چمپئن بن گیا، سہیل عباس اور ریحان بٹ کے گول کے ذریعے گرین شرٹس نے فائنل میں یک طرفہ طور پر ملائیشیا کو2-0 سے شکست دی اور ساتھ ہی 2012ء لندن اولمپکس کیلئے بھی کوالیفائی کرلیا، سیمی فائنل میں فتح کے ہیرو گول کیپر سلمان اکبر نے شاندار کارکردگی کا مظاہرہ کیا اور حریف کے کسی بھی حملے کو کامیاب نہیں ہونے دیا، میچ کے اختتام کی وسل بجتے ہی قومی ٹیم کے تمام کھلاڑی گراوٴنڈ میں سجدہ ریز ہوگئے جبکہ اسٹیڈیم پاکستان زندہ باد کے نعروں سے گونج اُٹھا۔قومی ٹیم کی فتح نے ثابت کردیا کہ اگر متحد ہوکر جیت کے عزم کے ساتھ میدان میں اترا جائے تو کامیابی ضرور قدم چومتی ہے۔کھلاڑیوں نے اپنے تاثرات میں کہا کہ وہ پاکستان کی جیت پر خوش ہیں اور طلائی تمغہ حاصل کرنا باعث فخر ہے ۔ قومی ہاکی ٹیم کی کامیابی کے بعد پورے ملک میں خوشی کی لہر دوڑ گئی اور جشن منایا گیا ، شہروں میں ہوائی فائرنگ کی گئی لوگ خوشی سے بھنگڑا ڈالتے ہوئے سڑکوں پر نکل آئے اور پاکستان زندہ باد کے نعرے لگائے۔بق ہاکی اولمپیئنز نے اسے پاکستان ہاکی کیلئے خوشگوار تبدیلی اور ملک میں ہاکی کے تابناک مستقبل کی نوید قرار دیا ہے اور کہا ہے کہ کھلاڑیوں نے سخت محنت سے فتح حاصل کی۔ ایشین گیمز میں کامیابی پاکستان ہاکی کی عظمت رفتہ کی بحالی کی جانب پہلا قدم کہا جاسکتا ہے۔
Posted by Unknown on Friday, December 03, 2010
انٹرنیٹ پر خفیہ معلومات شائع کرنے والی ویب سائٹ وکی لیکس نے امریکی سفارتی ملازمین کی جانب سے بھیجی جانے والی ڈھائی لاکھ دستاویزات جاری کردی ہیں ۔ان دستاویزات میں سعودی فرمانرواشاہ عبداللہ کے صدر زداری اور عراقی وزیراعظم نوری المالکی پر طنز کا ذکر کیا گیا ہے ۔ دستاویزمیں شاہ عبداللہ کی جانب سے آصف علی زرداری کو ملک کی ترقی میں سب سے بڑی رکاوٹ قرار دیتے ہوئے کہا گیا ہے کہ اگر سر ہی گلا سڑا ہو تو اس کا اثر سارے جسم پرپڑتا ہے۔شاہ عبداللہ کے حوالے سے یہ بھی کہا گیا ہے کہ انہوں نے امریکا کو ایران پر فضائی حملے کا مشورہ دیا تھا۔ جبکہ دستاویزات کے مطابق 2009ء میں امریکا نے پاکستانی ایٹمی ری ایکٹر سے یورینیم چرانے کی کوشش کی تاہم پاکستان نے ایٹمی معائنے سے انکار کر دیا۔علاوہ ازیں یہ انکشاف بھی سامنے آیا ہے کہ امریکا دوست ممالک کی بھی جاسوسی کرتا رہا ہے۔حکومت پاکستان نے وکی لیکس دستاویزات کے اجراء کو غیرذمہ دارانہ فعل قرار دیا ہے۔جبکہ میڈیا رپورٹس میں کہا گیا ہے کہ امریکا نے اس سلسلے میں پیشگی طور پر پاکستان کو اعتماد میں لیا تھا۔تاہم ابھی تک پاکستان پیپلزپارٹی کا ردعمل سامنے نہیں آیا جس کے شریک چیئرمین کے بارے میں شاہ عبداللہ کے طنزیہ کلمات سامنے آئے ہیں ۔ ہو سکتا ہے وفاقی وزیرداخلہ رحمٰن ملک ٹرانسپیرنسی انٹرنیشنل کی طرح وکی لیکس کو بھی جاسوسی کا ادارہ قرار دیتے ہوئے پاکستان میں اس پر پابندی لگا دیں ۔ لیکن کہتی ہے تجھ کو خلق ِ خدا غائبانہ کیا۔آپ بھی اس سلسلے میں اپنی رائے کا اظہار کر سکتے ہیں۔
Posted by Unknown on Friday, December 03, 2010
ماضی میں پاکستان میں سیاسی اتحاد بنتے اور ٹوٹتے رہے ہیں، اس طرح کے اتحاد عین اس وقت وقوع پذیر ہوتے ہیں جب کسی الیکشن کے تانے بانے بنے جاتے ہیں اور سیاستدان سر جوڑ کے بیٹھ جاتے ہیں، وقتی مصلحتوں سے کام لیا جاتا ہے۔ اسی طرح چار مسلم لیگی دھڑوں کے رہنماؤں نے ن اور ق لیگ کے بغیر متحدہ مسلم لیگ قائم کرنے کا اعلان کیا ہے جس کے سربراہ پیرپگارا ہوں گے۔ متحدہ لیگ میں فی الوقت ہر گروپ اپنے وجود، شناخت اور تنظیم کو برقرار رکھتے ہوئے شامل رہے گا۔ دیگر مسلم لیگی دھڑوں اور سیاسی جماعتوں سے رابطوں اور اتحاد کے تنظیمی اور قانونی معاملات کو حتمی شکل دینے کیلئے 13 رکنی آرگنائزنگ کمیٹی بھی تشکیل دی گئی ہے جس کے کنوینر سابق وزیراعظم میر ظفراللہ خان جمالی ہوں گے۔ اس بات کا اعلان مسلم لیگ (فنکشنل) کے سربراہ اور حروں کے روحانی پیشوا پیرپگارا کی رہائش گاہ پر مسلم لیگی دھڑوں کے دو روزہ اجلاس کے بعد پریس کانفرنس میں کیا گیا۔ قبل ازیں متحدہ مسلم لیگ کے پہلے باقاعدہ اجلاس سے خطاب اور میڈیا سے گفتگو کرتے ہوئے پیرپگارا نے کہا کہ مسلم لیگ کو متحد کرنے کا مقصد ملک میں بہتری لانا ہے۔ انہوں نے کہا اب وہی بچے گا جو مسلم لیگ میں آئے گا۔ متحدہ مسلم لیگ میں پیر پگارا کی فنکشنل لیگ، ہم خیال لیگ، ضیاء لیگ، عوامی مسلم لیگ شامل ہیں۔ متحدہ مسلم لیگ کی 13 رکنی آرگنائزنگ کمیٹی کے کنوینر میر ظفراللہ جمالی جبکہ ارکان میں حامد ناصر چٹھہ، سینیٹر سلیم سیف اللہ، پیر صدرالدین شاہ راشدی، اعجازالحق، مخدوم احمد محمود، شیخ رشید احمد، ہمایوں اختر، جہانگیر ترین، خورشید محمود قصوری، کشمالہ طارق، مہتاب اکبر راشدی اور سینیٹر غفار قریشی شامل ہیں۔ کمیٹی کے کوآرڈینیٹر امتیاز احمد شیخ ہوں گے۔ کمیٹی کو یہ اختیار بھی دیا گیا ہے کہ وہ مسلم لیگ (ن) اور مسلم لیگ (ق) سمیت دیگر مسلم لیگی دھڑوں سے رابطے کرے اور اس اتحاد کو مضبوط بنانے کیلئے اقدامات کرے۔ کمیٹی کو قانونی معاملات نمٹانے اور تنظیم سازی کیلئے سفارشات مرتب کرنے کیلئے بھی کہا گیا ہے جن کی حتمی منظوری پیرپگارا دیں گے۔ اس موقع پر خورشید محمود قصوری کا کہنا تھا کہ آج مسلم لیگی دھڑے متحد ہوئے ہیں اور کل یہ جماعت بن جائیں گے۔
Posted by Unknown on Saturday, November 13, 2010
Posted by Unknown on Wednesday, October 13, 2010
ایک محتاط اندازے کے مطابق امسال ستمبر2010 میں مہنگائی کی شرح میں گزشتہ سال کے مقابلے میں 15.71 فیصد کا اضافہ ریکارڈ کیا گیاجبکہ مختلف اشیاء خوردونوش کی قیمتوں میں53 فیصدتک اضافہ دیکھا گیا۔وفاقی ادارہ شماریات کے مطابق ستمبر2010میں گزشتہ سال کے اسی عرصے کے مقابلے میں مختلف اشیا خوردونوش کی قیمتوں میں16 سے 53فیصد تک کا اضافہ دیکھا گیا، اس کے علاوہ ایندھن اور بجلی کے نرخوں میں20 فیصد کا اضافہ دیکھا گیا۔اسی طرح اگست کے مقابلے میں ستمبر2010 میں مہنگائی میں مزید2.65 فیصدکا اضافہ دیکھا گیاجبکہ جن اشیا کی چیزوں میں سب سے زیادہ اضافہ رہا ،ان میں پیاز میں87 فیصد ، ٹماٹر میں24.85، مرغی17.76، چینی11 فیصد اور آٹے کی قیمتوں میں10.08کا اضافہ ریکارڈ کیا گیا۔ رپورٹ کے مطابق جولائی تا ستمبر2010 میں گزشتہ سال کے اسی عرصے کے مقابلے میں13.77 فیصد کا اضافہ ریکارڈ کیا گیا ۔یہ اعدادو شمار اس بات کے غماز ہیں کہ مہنگائی اپنے عروج پر جارہی ہے مختلف اشیاء خود و نوش جیسے دالیں ، آٹا چینی، سبزیاں ، گھی تیل ،گوشت دودھ چاول چائے ہر چیز دن بہ دن مہنگی ہوتی جارہی ہے، سیلاب نے مزید صورتحال ابترکردی ہے، سیلاب ٹیکس لگانے کی باتیں ہورہی ہیں، یہ خبر عوام کے لئے مزید پریشانی کا سبب بنتی جارہی ہے، مہنگائی کے خاتمے کے حکومتی دعوے دھرے کے دھرے رہ گئے، عوام کو ریلیف کس طرح دیا جائے ؟ َ گزارہ مشکل ہوگیا اور بچت صرف خواب بن کر رہ گئی،عوام اخراجات میں کہاں تک کمی کریں؟
Posted by Unknown on Wednesday, October 13, 2010
ملک میں حالیہ سیلاب کے بعد متاثرین سیلاب کسمپرسی کی زندگی گذارنے پر مجبور ہیں اور بے سروسامانی کی زندگی ان کے لئے تکلیف کا باعث بن رہی ہے۔ کہیں سرکاری سطح پر اور این جی اوز کے علاوہ سیاسی تنظیمیں ہر ممکن کوشش کر رہی ہے کہ ان افراد کی مدد کی جائے،کسی بھی امداد کو تقسیم کرنے پر بھوک و افلاس کے مارے انسانوں کی حالت اس وقت نا گفتہ بہ ہوتی ہے جب انہیں امداد کے حصول کیلئے لمبی قطاروں میں لگ کر ہزیمت اٹھانی پڑتی ہے۔ایسا ہی ایک واقعہ نوابشاہ میں وطن کارڈ کی تقسیم کے دوران اس وقت پیش آیا جب بھگدڑ سے ایک شخص کچل کر جاں بحق اورمتعدد شدید زخمی ہوگئے اور یوں ایک غریب اور مفلس شخص امداد تو حاصل نہ کرسکا لیکن اپنی جان سے ہاتھ دھوبیٹھا۔کیا ہمارے ارباب اختیار وطن کارڈ کی تقسیم کیلئے ایسا کوسہل نظام نہیں بناسکتے جس سے متاثرین سیلاب کی عزت نفس مجروح نہ ہو اور حکومتی امداد بھی حاصل کرسکے۔مذکورہ واقعہ میں بھگدڑ کے موقع پر مجمع کو قابو کرنے کیلئے پولیس کی ہوائی فائرنگ اور آنسو گیس کا استعمال بھی انتہائی افسوسناک ہے۔سوال یہ ہے کہ متاثرین کی مدد جس انداز سے کی جارہی ہے وہ درست ہے؟ کوئی مدد کے لئے ہاتھ بڑھاتا ہے تو پولیس والے اسے تشدد کانشانہ بناتے ہیں،ایسا معلوم ہوتا ہے کہ وطن کارڈ ان کے لئے کفن کارڈ بن گیا ہے، اس جانی نقصان کی تلافی کون کرے گا؟
Posted by Unknown on Wednesday, October 13, 2010
مسلم لیگ نواز نے سابق صدر پرویز مشرف کے خلاف چارج شیٹ جاری کر دی ہے ۔پیپلز پارٹی کے رہنما فیصل رضا عابدی کا کہنا ہے کہ نواز لیگ اس چارچ کو قومی اسمبلی میں پیش کرے جس سے دودھ کا دودھ اور پانی کا پانی ہوجائے گا۔ چارج شیٹ 10 صفحات پر مشتمل ہے۔ چارج شیٹ میں مارشل لاء کا نفاذ ، لال مسجد میں قتل عام ، اکبر بگٹی ، نیب کے ذریعے بلیک کرنا ، عدلیہ پر حملہ کرنا ، دو مرتبہ آئین معطل کرنا ، آرمی چیف حلف کی خلاف ورزی ، بلوچستان میں لاپتہ افراد اور سازشیں، لوگوں کو اغوا کرانا ، 12 مئی ،18 اکتوبر 2001 کو قتل عام ، فوج کو ذاتی مقاصد کیلئے استعمال کرنا ، عدلیہ پر حملہ اور این آر او کا نفاذ شا مل ہے۔ چارج شیٹ میں مسلم لیگ ن نے مطالبہ کیا ہے کہ سابق صدر پرویز مشرف کو انٹر پول کے ذریعے واپس لایا جائے اور انکے خلاف قانونی کارروائی عمل میں لائی جائے۔ آئین پاکستان کے آرٹیکل 6 کے تحت خلاف ورزیاں کرنے پر سزا دی جائے، کارگل پر کمیشن قائم کر کے اصل حقائق سامنے لائے جائیں ۔ این آر او کی بنیاد پر انسانی حقوق کی خلاف ورزی پر سابق صدر کے خلاف قانونی کارروائی کی جائیگی۔ چارج شیٹ میں 16 الزامات اور 7 مطالبات شامل ہیں۔ چارج شیٹ میں کہا گیا ہے کہ مشرف نے ہارس ٹریڈنگ کا آغاز کیا اور ملک کو دہشت گردی کے خلاف جنگ میں دھکیل دیا۔
Posted by Unknown on Wednesday, October 13, 2010
پاکستان کرکٹ بورڈ نے قومی کرکٹ ٹیم کا ٹیسٹ کپتان مصباح الحق کو مقرر کر دیا ہے ۔ دلچسپ بات یہ ہے کہ مصباح الحق خاصے عرصے سے اپنی خراب پرفارمنس کے باعث ٹیم میں جگہ بنانے میں ناکام چلے آرہے تھے۔ اب حیرت انگیز طور پر نہ صرف انہیں ٹیم میں شامل کیا گیا ہے بلکہ کپتان بھی مقرر کر دیا گیا ہے۔ ماضی میں کرکٹ بورڈ اس طرح کے فیصلے کرتا رہا ہے کہ ایسے کھلاڑی جن کی ٹیم میں جگہ بھی نہیں بنتی تھی انہیں کپتانی کے فرائض سونپ دیے جاتے تھے۔ جس کی وجہ سے ان کھلاڑیوں کی نہ صرف اپنی کارکردگی مزید خراب ہو جاتی تھی بلکہ ان کی ناقص کارکردگی کا اثر پوری ٹیم پر بھی پڑتا تھا اور نتیجے کے طور پرقومی ٹیم کی شکستوں کا سلسلہ دراز ہوتا رہا۔ پاکستانی ٹیم دنیا کی واحد ٹیم ہے جس کے پچھلے دو برسوں کے دوران آدھ درجن کپتان تبدیل ہو چکے ہیں ۔ یونس خان، محمد یوسف، شعیب ملک ، سلمان بٹ اور شاہد آفریدی سامنے کی مثالیں ہیں۔ ان میں سے سوائے یونس خان کے کسی کپتان نے بھی بے مثال کارکردگی کا مظاہرہ کرتے ہوئے قومی ٹیم کو کامیابی کی راہ پر گامزن نہیں کیا۔ بلکہ مختلف قسم کے تنازعات میں الجھا دیا۔ اب جبکہ مسلسل ناکامیوں اور بدنامیوں کے بعد ٹیم کو موجودہ صورتحال سے نکالنے کے لیے ایک ایسے کھلاڑی کو کپتان مقرر کرنے کی ضرورت تھی جس کی اپنی کارکردگی پوری ٹیم کے لیے ایک مثال ہو۔ ایسے وقت میں مسلسل باہر رہنے والے کھلاڑی مصباح الحق کو کپتان مقرر کر کے پاکستان کرکٹ بورڈ کے ارباب ِ بست و کشاد کیا حاصل کرنا چاہتے ہیں ۔ یہ ایک سوالیہ نشان ہے ۔ آپ کے خیال میں مصباح الحق کو کپتان بنانے کی کیا وجوہات ہو سکتی ہیں ؟ اس کے ساتھ قومی ٹیم میں ایسے کھلاڑیوں کو بھی شامل کیا گیا ہے جو کئی عرصے سے ٹیم کا حصہ نہیں تھے ۔ اس صورتحال میں مصباح الحق ایک بالکل نئی ٹیم کے ذریعے کیا نتائج دے سکتے ہیں ؟ کیا کرکٹ بورڈ کے یہ اقدامات بھی سپاٹ فکسنگ کے زمرے میں تو نہیں آتے ؟ آخر کب تک کرکٹ سے دیوانگی کی حد تک لگاؤ رکھنے والی اس قوم کے ساتھ جوا ء کھیلا جاتا رہے گا ؟
Posted by Unknown on Wednesday, October 13, 2010
یورپی یونین نے پاکستان کی 75 صنوعات کو تین سال تک ڈیوٹی فری برآمد کرنے کی اجازت دے دی ہے جس سے پاکستان کی سالانہ برآمدات میں 90کروڑ یورو کا اضافہ ہو گا۔ یورپی یونین نے جن مصنوعات کو ڈیوٹی فری کی سہولت دی ہے ان میں چمڑے کی 6‘ٹیکسٹائل کی 65اور زرعی مصنوعات شامل ہیں۔ یورپی یونین نے پاکستان کو یورپی منڈیوں تک اپنی مصنوعات ڈیوٹی فری فروخت کرنے کی 3سال کیلئے سہولت دی ہے پاکستان کی جن اشیاء کو یورپی منڈیوں میں ٹیکس کی رعایت دی گئی ہے ان میں65اشیاء ٹیکسٹائل شعبے اور6 لیدر کی اشیاء شامل ہیں۔ اس چھوٹ سے 9 سو ملین کی ڈیوٹی فری اشیاء یورپی منڈیوں تک پہنچ سکیں گی۔ اس وقت پاکستان سے درآمد کی جانیوالی مصنوعات کا حجم15بلین یورو ہے جس میں ٹیکس چھوٹ سے اضافے کی توقع ہے،برطانیہ کا تجویز کردہ ٹیکس چھوٹ پیکیج چند روز میں یورپین پارلیمنٹ میں پیش کردیا جائیگا۔ یورپی یونین کے ترجمان نے کہا کہ اب یہ پاکستان پر منحصر ہے کہ کس طرح وہ مارکیٹ کی ضروریات کو پورا کرتا ہے اور اپنی اشیاء کو یہاں پہنچاتا ہے۔
Posted by Unknown on Wednesday, October 06, 2010
سابق صدر پرویز مشرف سیاست میں قدم رکھنے کے باوجود اپنے آمرانہ ذہنی رویے سے چھٹکارا نہیں پاسکے۔ دو بار آئین کو توڑنے، لال مسجد میں قتل عام کرانے، شخصی حکمرانی کے لئے ملکی آزادی کا سودا کرنے، ڈاکٹر عافیہ صدیقی سمیت بے شمار بے قصور شہریوں کو فروخت کرنے، اعلیٰ عدلیہ کے ججوں کو معطل کرنے، فوج کشی کے ذریعے بلوچوں کے احساس محرومی کو بیزاری کی سطح تک پہنچانے، خیبر پختونخوا کو شعلوں کی نذر کرنے اور میڈیا کا گلا گھونٹنے جیسے طویل ریکارڈ کے باوجود سیاسی پارٹی کی تشکیل کے اعلان سے جو حلقے ان سے جمہوری اقدار کے احترام اور متانت کی توقع رکھتے تھے انہیں جلسے میں کی گئی تقریر سے مایوسی ہوئی جس میں نواز شریف اور ان کے ساتھیوں پر شدید ذاتی حملے کرتے ہوئے بہت غیرشائستہ لب و لہجہ اختیار کیا گیا اور اخلاق سے عاری انداز اختیار کیا گیا۔ انہیں عقل سے فارغ البال کہا، یہی نہیں بلکہ انہیں کہا کہ شکل اچھی نہیں تو بات تو اچھی کرلو،اگر دوسرے بھی ان کے جواب میں ذاتی حملے کرنے اور کیچڑ اچھالنے لگے تو اندازہ لگایا جاسکتا ہے کہ بات کہاں تک جاسکتی ہے۔ ہمارے ملک کی سیاست میں ایسے ادوار آتے رہے ہیں جب کسی سیاستداں ایک دوسرے کے خلاف غیر مہذب زبان استعمال کی ۔ سابق صدر کو وطن اور بیرون ملک مقیم پاکستانیوں کے ان جذبات کا احساس ہونا چاہئے۔لیکن شاید لوگ نہیں جانتے کہ اس سے قبل بھی الیکشن کی مہم کے دوران سیاسی لیڈراسی طرح کی دشنام طرازیوں پر اتر آتے ہیں، رانا ثناء اللہ نے بابر اعوان کو کالی بھیڑ کہا، اور فوزیہ وہاب نے رانا ثناء اللہ کربسوں میں کھڑے ہو کر منجن بیچنے والا کہا، کئی سال پہلے بھٹو مرحوم نے اصغر خان کو آلو کہا کرتے تھے، اور ایک ممتاز سیاستدان میاں دوممتاز خان دولتانہ مرحو م کو چوہا کہا تھا، اس طرح کی عامیانہ ذوق کی باتیں ایک دوسرے کو نیچا دکھلانے کے لیے کی جاتی ہیں،
Posted by Unknown on Wednesday, October 06, 2010
سابق صدر پرویز مشرف نے لندن میں بیٹھ کر اپنی سیاسی پارٹی کا اعلان کرتے ہوئے ملک و قوم کو موجودہ بحرانوں سے نکالنے کا عزم کیا ہے۔ اس کے ساتھ ہی انہوں نے این آر او پر دستخط کو اپنی غلطی قرار دیتے ہوئے قوم سے معافی بھی مانگی ہے۔ ان کا یہ بھی کہنا تھا کہ انہوں نے بے نظیر سے ڈیل کی تھی، جس کے تحت یہ معاہدہ ہوا تھا کہ وہ الیکشن سے پہلے وطن واپس نہیں آئیں گی۔ اس کے بدلے ان کے خلاف دائر تمام مقدمات واپس لینے کی یقین دہانی کروائی گئی تھی۔ سابق جرنیل کی ان باتوں میں پائے جانے والے تضادات زیربحث لائے بغیر مختلف سیاسی و مذہبی اور مختلف شعبہ ہائے زندگی سے تعلق رکھنے والے رہنماؤں کے بیانات کو دیکھا جائے تو قومی سطح پر یہ اتفاق رائے نظر آتا ہے کہ پرویزمشرف دوبارہ اس ملک پر حکمرانی کے خواب میں اس حد کھو چکے ہیں کہ انہیں زمینی حقائق کی خبر ہے نہ پرواہ۔سیاسی ومذہبی رہنماانہیں قومی مجرم قرار دیتے ہوئے انہیں جیل بھیجنے کا مطالبہ کر رہے ہیں ۔ وکیل رہنماؤں کا کہنا ہے وہ ملک کے مجر م ہیں اور پوری قوم ان سے نفرت کرتی ہے ۔ وزیرداخلہ رحمن ملک کے مطابق بے نظیر بھٹو نے پرویز مشرف کے ساتھ کوئی ڈیل نہیں کی تھی۔ این آر او مشرف اور پیپلزپارٹی میں نہیں کسی دوسری پارٹی کے درمیان ہوا۔ یہ دوسری پارٹی کون سی تھی۔ اس کے بارے میں انہوں نے کچھ نہیں بتایا۔لیکن مشرف چونکہ اسے اپنی غلطی قرار دے چکے ہیں ۔ تو ضروری ہے کہ اس ایک غلطی کے ساتھ ان کی دیگرغلطیوں کی نشاندہی بھی کر دی جائے۔ ان کے جرائم کی فہرست ویسے تو کافی طویل ہے لیکن چیدہ چیدہ جرائم میں دو مرتبہ آئین میں بگاڑ پیدا کرنا، پاکستانی شہریوں بشمول ڈاکٹر عافیہ صدیقی کو امریکا کے ہاتھ فروخت کرنا، لال مسجد کا قتل عام ، نواب اکبر بگٹی کا قتل ، 12مئی 2007ء کا خون خرابہ، اعلیٰ عدلیہ کے ججوں کو معطل اور گرفتار کرانا، پاکستانی میڈیا کو زیر عتاب لاناشامل ہیں ۔ آپ کے خیال میں جس آدمی کا ماضی اتنا داغدار ہو وہ ایک بار پھر ملک و قوم کی قسمت سنوارنے کا امیدوار کیسے ہو سکتا ہے۔ کیا پرویز مشرف کی غلطیاں یا ان کے جرائم ایسے ہیں کہ انہیں باآسانی معاف کیا جا سکتا ہے؟ اگر وہ پاکستان آتے ہیں تو کیا قوم ایک بار پھر انہیں گلے لگانے کے لیے تیار کھڑی ہوگی یا ان کے خلاف آئین کے آرٹیکل 6 کے تحت مقدمہ چلے گا ؟
Posted by Unknown on Wednesday, October 06, 2010
بھارتی عدالت نے تاریخی بابری مسجد کو شہید کرنے کے حوالے سے دائر مقدمے کا فیصلہ سناتے ہوئے مسلمانوں کے موقف کو مسترد اور بابری مسجد کی اراضی کو رام جنم بھومی قرار دے دیا ہے، ا لہٰ آباد ہائی کورٹ نے متنازع اراضی کو تین حصوں میں تقسیم کرنے کاحکم دیاہے جن میں رام جنم بھومی کاحصہ ہندووٴں، مسجدکی زمین مسلمانوں اور تیسرا حصہ ہندووٴں کے ادارے نرموئی اکھاڑے کو دیا جائے۔فیصلے پر تین ماہ کے اندر عملدر آمد کرنے کا حکم دیا گیا ہے۔الہ آباد عدالت کا فیصلہ بظاہر کسی پنچایت کا فیصلہ معلوم ہوتا ہے کیونکہ اس فیصلے میں تنازع کا کوئی مستقل حل نظر نہیں آتا بلکہ مسلمانوں کے ساتھ زیادتی کا تاثر ملتا ہے۔ سنی وقف بورڈ نے فیصلے کومسترد کرتے ہوئے کہا ہے کہ عدالتی فیصلے کے خلاف سپریم کورٹ سے رجوع کیا جائے گا۔بھارتی وزیر اعظم ڈاکٹر منموہن سنگھ نے لوگوں سے پرُامن رہنے کی اپیل کی ہے۔
کراچی سے بھارت جانے والی تھر ایکسپریس بم سے اڑانے کی کوشش ناکام 
Pakistan Rupee Exchange Rate
