میگا ایونٹ میں گرین شرٹس کو سیمی فائنل کھیلتا دیکھ رہا ہوں، آفریدی

پاکستان کرکٹ ٹیم کے کپتان شاہد خان آفریدی ورلڈکپ روانگی سے قبل پریس کانفرنس میں کھلاڑی کم اور جذباتی سیاستدان زیادہ نظر آئے، وہ اپنے کھلاڑیوں کو ہلا شیری دینے کے ساتھ ساتھ سابق کرکٹرز پر بھی برس پڑے۔ قذافی اسٹیڈیم لاہور میں شاہد آفریدی نے کہا کہ وہ ٹیم کمبینیشن سے مطمئن ہیں اور گرین شرٹس کو میگا ایونٹ کے سیمی فائنل میں کھیلتا دیکھ رہے ہیں۔

کپتان آفریدی نے سابق کرکٹرز کو سخت الفاظ میں تنقید کا نشانہ بنایا۔ انہوں نے کہا کہ ٹیم کی پرفارمنس پر سوالیہ نشان لگانے اور شائقین کو الو بنانے والے کرکٹ مبصرین کو ذرا ریکارڈ چیک کر بات کرنی چاہئے۔ دوسری جانب ٹیم کوچ وقار یونس اور منیجر انتخاب عالم ٹیم کی حالیہ پرفارمنس سے خوش نظر آئے جن کا کہنا تھا کہ تنازعات نے پاکستان کرکٹ کو بہت پریشان کیے رکھا اب سب کچھ بھلا کر کھیل پر توجہ دینا چاہتے ہیں۔